'El apagón' de Puerto Rico

O obxectivo desta infografía é o de unir dous eidos totalmente distintos -a música e a política- para explicar a crise actual pola que está pasando Puerto Rico. Bad Bunny, un dos seus artistas máis recoñecidos, fala deste problema nunha das súas últimas cancións (aínda que a maioría descoñece do que verdadeiramente está a falar), polo que vin unha oportunidade moi boa para facelo chegar á sociedade.

Así, facéndome pasar por membro dunha asociación que vela polo pensamento enerxético en Puerto Rico, decidín explicar o contexto, a orixe e as causas desta situación a través das letras do cantante portorriqueño; todo de xeito resumido e acompañado de elementos visuais relacionados.

Xa na práctica, escoller o deseño final foi unha tarefa bastante complexa debido á propia complexidade do tema. Deste xeito, decidín optar por un deseño elaborado dende Canva que guía a lectura ao longo da canción para seguir, á súa vez, a cronoloxía da crise enerxética. O feito de incluír texto explicativo era algo inevitable, xa que cómpre explicar de cero o acontecido para aqueles que descoñecen totalmente a problemática. Co fin de facela máis visual, optei tamén por incluír fotos e vídeos que contextualizaran e deran imaxe ao propio texto.

Por outra banda, empreguei cores ligadas á bandeira para ter certa continuidade no deseño. Ao falar dende unha asociación de Puerto Rico, e tendo en conta o simbólica que a bandeira é durante as protestas, escollina como fondo da infografía, o que tamén facilita a súa rápida relación co país.