Práctica 1. A "outra" infografía

Polo xeral, adoitamos falar do xornalismo como un dos maiores expoñentes no uso da infografía nos nosos días. Porén, o noso sector non é o único que se serve deste tipo de narracións visuais. Dende hai anos é cada vez máis habitual ver exemplos de infografía nos que á función informativa se lle suma unha función comercial ou de promoción.

​

Tanto organizacións como particulares en sectores moi diversos (cultura, turismo, deporte, e un longo etcétera) fan da infografía unha ferramenta para atraer e comunicar a partes iguais. Para atraer, polo alto carácter visual da comunicación do noso tempo, onde espazos como as redes sociais foron gañando peso como lugares a través dos cales informar, entreter e tamén ofrecer produtos e servizos. Para comunicar, porque a publicidade ou o marketing non deixan de ser xeitos de facer comunicación.

​

Nesta primeira práctica buscaremos vender, aconsellar ou captar público para unha experiencia, un lugar, un evento ou calquera cousa que se vos ocorra. Cada un e cada unha de vós actuará como unha organización, promovendo unha comunicación que busque atraer público ás súas actividades. E todo a traves da infografía.

​

Para tal fin comezaremos empregando unha serie de ferramentas que nos axudarán a achegarnos á disposición dos elementos sobre un espazo de traballo en branco. O reto desta primeira práctica é o de comezar a entender como funcionan en conxunto elementos como a cor, a tipografía ou as iconas, buscando facer materiais visuais atractivos para a audiencia pero eficientes á hora de ser consultados.

​

Así, propoñemos catro aplicacións en liña cun uso moi sinxelo: Canva, Infogram, Piktochart e Easel.ly. O acceso a calquera delas é, de xeito semellante ao que nos acontecerá con todas as que empregaremos,  sinxelo e libre. Abonda con crear un usuario co noso correo electrónico ou mesmo identificarse a través das contas que poidamos ter en en plataformas como Google, entre outras.

​

A orde na que se presentan as aplicacións Canva / Infogram, Piktochart e Easel.ly está tamén vencellada á súa facilidade de uso e ao que estas permiten sen ter que acudir ás versións de pago. Por este motivo, pode que vos resulte máis sinxelo facer a vosa tarefa empregándoas con esa orde de preferencia. No entanto, cando nos dispoñemos a realizar un traballo botando man de ferramentas de deseño, o máis importante é ver cal se adapta mellor ao que queremos presentar, así que a decisión é totalmente vosa.

​

Consellos para este primeiro traballo:

- Non abusar do texto.

- Non abusar dos datos.

- Sinxeleza e atractivo ("menos é máis").

- Asinar os traballos e identificar as fontes (a ter en conta para todos os proxectos que fagamos)

​

A continuación preséntovos algúns exemplos a modo de referencia do que se pode facer en aplicacións deste tipo de cara a construír infografías cunha óptica diferente á que empregariamos no xornalismo. 

​