Neste mapa intentei destacar os puntos máis interesantes para visitar en Bertamiráns. Obviamente, non é tan sinxelo facer unha peza deste tipo cunha ubicación tan pequena, pero gustoume o reto de centrarme nunha zona tan específica e, a ollos de quen non a coñece, sen nada realmente especial (algo co que non estou de acordo!). Así, elaborei seis grupos para que o usuario poida atopar con facilidade o que queira ver: parques e áreas naturais, prazas, zonas para facer deporte ou actividades ao aire libre, hostalería, edificios públicos (centros culturais, a radio, colexios...) e áreas (centro, aforas...).
Unha mágoa é o feito de estar limitado polo número de imaxes que se poden incluír (optei por deixar sen elas a algúns edificios públicos porque non son demasiado vistosos, pero o xeito de desfrutar plenamente do mapa sería con elas) e non poder empregar o mapa de base que me gustaría (que é "SATELLITE", na categoría "MAPBOX").
Ligazón do mapa na páxina: https://maphub.net/eladiogonzalezlois/proba
O mapa:
Pois está moi ben resolto, tanto no plano do contido (moi compensado) como no do tipo de recursos que empregas. Fas un uso moi intelixente das imaxes e o hipertexto e todos os elementos están utilizados dun xeito moi eficiente. Ademais, a distribución do menú é excelente e facilita moito a consulta do traballo.
Se tivese que sinalar un punto no que hai certa confusión é no dos grupos que conforman a categoría de "Parques e áreas naturais". Ao empregar esa vista de satélite e esa cor verde non hai demasiado contraste e é preciso facer moito zoom para identificalas. Este podería ser un dos casos nos que nos desprendemos desa idea de (verde=natureza) para apostar por un maior contraste…